L-Iskop tal-Beżżul Bieżel
Il- qofol ta' din il-gazzetta hi li tissuplixxi l-umur Malti u tqanqal l-interess fiċ-ċajt u s-satira Maltija. L-iskop tal-gazzetta huwa wieħed nejjieki u jiżvolġi f'kummentarju satiriku fil-forma ta’ karikaturi, kartelluni umoristiċi, komiks, u artikli żuffjettużi. It-tim tal-Beżżul Bieżel jemmen li din l-inizjattiva hija bżonnjuża hekk kif qegħdin naraw il-kultura Maltija tmut u s-sugu tal-kontenut imajna ma' kull ġurnata li tgħaddi. L-espressjoni umoristika saret xotta iżjed minn qatt qabel fejn l-użu tal-Malti naqas ġmielu u s-suġġetti diskussi saru reċiklati u eġemonizzati għall-aħħar. Il-Beżżul Bieżel jixtieq jibdel dan kollu. Li tagħmilna differenti hu li m’għandniex wisq x’nitilfu.
Bħal ħafna, aħna ngħixu fuq din il-gżira u
m’aħniex nieħdu pjaċir b'li qed naraw. It-tingiż nejjieki u ċajtier iwassal biex jikxef borom mhux mikxufin, u meta wieħed juża s-satira sabiex jgħaddi osservazzjonijiet veritarji, ikun qiegħed jikxef kixfa lir-re u jneżżgħulu ħwejġu u jħallieh għarwien ħuta bil-firilla barra. Arma jew tarka? Targħa kif taraha, nistgħu ngħidu fiċ-ċert li meta xejn ma jaħdem, l-umur jkollu jieħu r-responsabilta bħala l-aħħar difiża qabel ma jikkrolla kollox. Għaldaqstant, aħna m’aħniex noffru soluzzjoni, iżda gazzetta, li ċerti li ser iġġielgħek tidħak jew talanqas titbissem u tgħid bejnek u bejn ruħek “Tassew, ara veru beżżul bieżel...”
Il-bidu tal-Gazzetta Komika.
Ftit fuq il-Fundaturi
Il-gazzetta tal-Beżżul Bieżel ma nħolqitx mill-lejl għan-nhar. Bħala gazzetta perjodika aħna niltaqgħu regolarment sabiex nipprovdulkom l-aqwa prodott possibli. L-iskop kien ċar mill-bidu hekk kif indunajna li l-format ta' gazzetta komika huwa ferm interessanti u bżonnjuż. Bil-kapaċitajiet tagħna, ingħaqadna sabiex noħolqu prodott artistiku u uniku. Allavolja l-enfasi tal-kontenut huwa fit-tpinġija umoristika, ninkludu wkoll artikli u kitba li huma xorta waħda importanti. Meta tgħaqqad it-tnejn flimkien, joħroġlok il-'Beżżul Bieżel'.
Il-fundaturi jixtiequ jeżebixxu d-dinja affaxxinanti tas-satira u l-komiks umoristiċi f'forma t’arti li qatt ma kellha daqshekk prevelanza hawn Malta. Għaldaqstant, bħala fundaturi u diretturi tal-gazzetta nixtiequ nrawmu iżjed interess f’din il-forma t'epressjoni bit-tama li tirreċiprokaw din il-passjoni u l-imħabba lil ġenerazzjonijiet li tilgħin.
Il-Beżżul Bieżel hija l-gazzetta perfetta għall- umorist u s-satirist. L-għadu ewlieni ta’ min ma jħobbx iċ-ċajt!
Komiks Sottokulturali Maltin
Għaqda tal-komiks intenzjonata li tiġbed artisti Maltin fix-xena sottokulturali tal-komiks u li trawwem iżjed il-kitba u l-kreazzjoni tal-komiks bil-Malti. L-iskop huwa li ssostni industrija moderata ta’ komiks lokali miktubin bil-Malti sabiex jippopolarizzaw il-format u l-espressjoni tal-komik kif ukoll il-lingwa Maltija.